بەیاننامەی یزاکا و مەحکووم کردنی تاوانەکانی کۆماری ئیسلامی ئێران بە دژی خۆپێشاندەران.

بەیاننامەی یەکیەتی زانایانی ئایینی کوردستانی ئێران و
مەحکووم کردنی تاوانەکانی کۆماری ئیسلامی  ئێران بە دژی خۆپێشاندەران.
بەناوی خودای تێکدەری کۆشکی زۆراری و ستەم و بەدیهێنەری ئازادی.
گەلانی ئازادی ئێران و کوردستان و جیهان،
ویژدانە بە ئاگا بوو و مرۆڤ دۆستەکان، ڕێکخراوەکانی مافی مرۆڤ و نێودەوڵەتییەکان:
یەکیەتیی زانایانی ئایینی کوردستانی ئێران، بەوپەڕی ناڕاحەتی و توڕەیی و خەمەوە.

 سەرکوت خوێناوی و کۆمەڵکوژیی دڕندانەی ناڕازیانی ئێران، لە لایەن هێزە سەرکوتکەر و تیرۆریستییەکانی حکوومەتی کۆماری ئیسلامی ئێرانەوە، بە توندی شەرمەزار دەکات.
ئەوەی ئەمڕۆ لە ئێراندا دەگوزەرێت، "بەریەککەوتنی ئەمنی" نییە، بەڵکو تاوانێکە دژی مرۆڤایەتییە. تەقەکردنی ڕاستەوخۆ لە کەسانی بێ بەرگری و کوشتنی گەنجان و ژن و منداڵ و دەستگیرکردنی بەکۆمەڵ و ئەشکەنجەدان و بێسەروشوێنکردنی زۆرەملێ و دروستکردنی کەش وهەوای تیرۆر، هیچ پاساوێکی ئایینی و ئەخلاقی و مرۆیی و یاسایییان نییە. ئەم کارانە بە ڕوونی دژایەتی دەستووراتی ئیسلام و بنەماکانی مرۆڤ و هەموو پێوەرەکانی مافی مرۆڤی نێودەوڵەتی دەکەن.
ئێمە وەک زانایانی ئایینی بە دەنگی بەرز ڕایدەگەیەنین: هیچ حکومەتێک مافی ئەوەی نییە بەناوی ئایینەوە تەقە لە خەڵک بکات لە ژێر هسچ پاساوێکدا.
هیچ دەسەڵاتێک بۆی نییە بە توندوتیژی وەڵامی خواستی ئازادی و دادپەروەری و کەرامەتی مرۆڤ بداتەوە؛
وە هیچ دەسەڵاتدارێک ناتوانێت بە فەتوا و پاساوی سیاسی پاساو بۆ خوێنی خەڵکی بێتاوان بدات.
یەکیەتیی زانایانی ئایینی کوردستانی ئێران وێڕای ڕاگەیاندنی هاوسۆزی تەواو لەگەڵ بنەماڵەی کوژراوان، بریندارەکان، زیندانیانی سیاسی و هەموو خەڵکی ستەملێکراوی ئێران، داوا لە کۆمەڵگەی نێودەوڵەتی و نەتەوە یەکگرتووەکان، ئەنجومەنی مافی مرۆڤ، دادگا نێودەوڵەتییەکان، ڕێکخراوەکانی مافی مرۆڤ، و حکومەتە ئازادەکانی جیهان دەکات:  کــــــــــــە
تاوانەکانی حکومەتی ئێران بە تاوانی دژ بە مرۆڤایەتی بناسن؛
ئەنجامدەر و بەرپرسەکانی ئەم کۆمەڵکوژییانە بخەنە ژێر لێپێچینەوەی نێودەوڵەتی؛
ڕێگری لە بەردەوامیی سەرکوت و کوشتنی خەڵک بە جێبەجێکردنی فشاری سیاسی و یاسایی و نێودەوڵەتی و بگرە بەکارهێنانی هێزی سەربازیش؛
پشتیوانی کردەیی و کاریگەر بۆ گەلی ئێران لە ڕێگای گەیشتن بە ئازادی، دادپەروەری، کەرامەتی ئینسانی و مافی چارەی خۆنووسین.
ئێمە پێمان وایە بێدەنگی لە بەرامبەر ستەمدا خۆی بەشداریکردنە لە تاوانەکەدا. ئەمڕۆ تاقیکردنەوەی گەورەی مرۆڤایەتی و باوەڕی ئایینی ڕاستەقینە و ویژدانی جیهانی لەبەردەم هاواری گەلی ئێراندایە.
لە کۆتاییدا جەخت لەوە دەکەینەوە:
خوێنی ستەملێکراو هەرگیز ناکوژێتەوە،
و دادپەروەری هەرچەندە درەنگ بێت، بەڵام حەتمییە و بەدی دێت.

سڵاو لە ئیرادەی ئازادی خوازی خەڵکی ئێران و کوردستان.

بڕوخێت ڕژیمی مرۆڤکوژ و دڕندە و تیڕۆریستی کۆماری سیدارە و خوێنی ئێران.

یەکیەتی زانایانی ئایینی کوردستانی ئێران

٢٣ی بەفرانباری ساڵی ١٤٠٤ی هەتاوی