کاتێک سەرکردەی کورد هاوشێوەی پێغەمبەران _دروودی خودایان لەسەربێت_ شەهید دەکرێن.مامۆستا ئارام

کاتێک سەرکردەی کورد هاوشێوەی پێغەمبەران _دروودی خودایان لەسەربێت_ شەهید دەکرێن.

 

ئەگەر کەمترین خوێندنەوە بۆ قوڕئانی پیرۆز بکەین، لێوانلێوە لە بەسەرهاتی ئەو سەرکردە و پێغەمبەرە پاکانەی کە دڵسۆزانە و بێ‌بارنبەر هەوڵی بێ‌پسانەوە و ماندووبوونیان داوە بۆ ئەوەی هەندێک لە ستەمی دنیاگری سەردەمیان کەمکەنەوە و خەڵکی لە کۆیلایەتی و بندەستی و چەوساوەیی بهێننە دەر و ڕزگاریان بکەن.

 

وەک دەفەرمێت:((وَمَآ أَسۡـَٔلُكُمۡ عَلَيۡهِ مِنۡ أَجۡرٍۖ إِنۡ أَجۡرِيَ إِلَّا عَلَىٰ رَبِّ ٱلۡعَٰلَمِينَ)) شعراء/۱۲۷

[هوود _دروودی خودای لەسەر بێت_ پێی گوتن:] وە هیچ بەرامبەرێکتان لێ‌داواناکەم، پاداشتی من تەنها لەسەر پەروەرێنەری هەموانە.

 

بەڵام هەر ئەوانەی کە ئەو نێردراوە پیرۆز و مەزنانەی خودا دەیانکۆشا بیانگەیەننە سەربەستی، داوێنیان بە شەهید کردنی ڕزگار کەرەکانیان سوور کرد و بە دڕندەترین شێواز کوشتیانن.

 

((قَالُواْ حَرِّقُوهُ وَٱنصُرُوٓاْ ءَالِهَتَكُمۡ إِن كُنتُمۡ فَٰعِلِينَ)) انبیاء/٦٨

گوتیان ئیبڕاهیم بسووتێنن و یاریدەی خوداکانتان بن ئەگەر دەیکەن.

 

((إِنَّ ٱلَّذِينَ يَكۡفُرُونَ بِـَٔايَٰتِ ٱللَّهِ وَيَقۡتُلُونَ ٱلنَّبِيِّـۧنَ بِغَيۡرِ حَقࣲّ وَيَقۡتُلُونَ ٱلَّذِينَ يَأۡمُرُونَ بِٱلۡقِسۡطِ مِنَ ٱلنَّاسِ فَبَشِّرۡهُم بِعَذَابٍ أَلِيمٍ))آل عمران/۲۱

بەڕاستی ئەوکەسانەی کافر بوونە لەحاڵێکدا کە پێغەمبەرانیان بە ناهەق کوشتن و ئەو کەسانەی ئەمریان بە دادپەروەری دەکرد دەیانکوشتن، مژدەی سزایەکی بەژانیان پێ‌بدە.

 

ئەوەی جێی سەرنجە هاوشێوەیی شەهیدکرانی سەرکەردە شەهیدەکانی کوردستانە لەگەڵ شەهیدکرانی پێغەمبەران _دروودی خودایان لەسەر بێت_، وێڕای ئەوەی بازاڕی خەباتەکەیان جودایە، لەوەدا کە ئەوانیش هەموو هەوڵیان ئاگا کردنەوەی مللەتی ئێران و وەدیهێنانی دێموکڕاسی و ئازادی بوو بۆ ئەو گەلە، هەر وەک بۆ ئازادی و دێموکڕاسیان بۆ میللەتی خۆیان دەویست.

 

بۆ پشت ڕاست کردنەوەی ئەو داوایە دروشمی بەناوبانگی دوکتۆر قاسملوو و حیزبی دێموکڕاتی کوردستانی ئێران بوو کە دەیگوت: دێموکڕاسی بۆ ئێران، خودموختاری بۆ کوردستان

 

بەڵام کۆیلە و بەکرێگیراوانی ئێرانی بە وێنەی، لە بێ‌خەبەران کەشکەک سڵاوات، داوێنی سووری داگیرکەریان سوورتر کرد و مێژووی گەنیوی ستەمیان لە هەمبەر گەلی کورد بۆگەنتر کرد و لە ۲۲ـی پووشپەڕی ٦٨ـدا، لە ڤیەنی پێتەختی ئۆتریش دوکتۆر عەبدوڕڕەحمانی قاسملوو و لە ۲٦ـی خەرمانانی ۱۳۷۱ـدا، دوکتۆر سادقی شەرەفکەندی لە هوتێلی میکۆنووسی بێڕلینی پێتەختی ئاڵمان و هەردووکیان لەسەر مێزی دانووستان (واتا لە کاتێکدا کە بۆ ئازادی وڵاتی ئەو کەسانەی کە لەوبەری مێزەکەیەوە بوون، موزاکەرەیان لەگەڵ دەکردن)، بە ناجوامێرانەترین هەڵوێست شەهیدکردن.

 

ئەوە خاڵی هاوبەشی سەرکردەی کورد و سەرکردەی ئەدیانە کە هەردووک لا بە دەستی ئەو کەسانەی هەوڵیان دەدا بێ‌چاوەڕوانی ڕزگاریان کەن شەهید کران.

مامۆستا ئارام

یەکیەتی زانایانی ئایینی کوردستانی ئێران

١٨ی خەرمانانی ١٤٠٤ی هەتاوی