پەیامی کۆمەڵێک لە مامۆستایانی ئایینی ڕۆژهەڵات، لەمەڕ سزای زیندانی کردن و خەلعی بەرگی ئایینی مامۆستا لوقمان ئەمینی.

حکوومەتی کۆماری بە ناو ئیسلامی لە درووشمی حکوومەتی ئایینیەوە بۆ دەسەڵاتێکی تێئۆکڕات و تووتالیتێر.

 

هەڵوێستی هەندێک لە مامۆستا و خوێندکاران و کەسایەتیە ئایینیەکان لە ڕۆژهەڵاتی کوردستان، سەبارەت بە سزای بەندکران و داماڵینی بەرگی مامۆستایەتی لە مامۆستا لوقمانی ئەمینی.

 

السلام علیکم و رحمت الله و برکاته

 

مامۆستا لوقمانی ئەمینی وەک مامۆستایەکی خۆشناوی ئایینی و کەسایەتیەکی کاریزمای کۆمەڵایەتی و خواناسێکی بە ئەزموونی سەردەمیانە، چەند کات و زەمانە، بە هۆی هەڵوێستە بوێرانە و بە جێکانی لە کاتی ڕووداوە هەستیارەکان و هەوڵە چڕەکانی بۆ لەیەک نزیک کردنەوەی موسوڵمانانی کوردستان، جێی خۆی لە دڵی خەڵکانی کوردستاندا کردۆتەوە و جێی ڕێزی جەماوەری نیشتمانە.

 

بۆیە، بە تاوانی ناڕەوا و ناڕوونی (بێڕێزی بە پیرۆزیەکانی ئیسلام) لە لایەن دادسەرای تایبەت بە ڕۆحانیەکانی تارانەوە، سزای سێ ساڵ و یەک مانگ بەندکران و داماڵینی تاهەتایی بەرگی مامۆستایی بەسەردا سەپاوە.

 

جێی خۆیەتی بڵێین: مامۆستا لوقمان و بێڕێزی؟!

مامۆستا لوقمان کە بۆ تەنیا جارێک بێڕێزی بە ئەو نەویستانەی خۆی نەکردووە کە هەندێک جار حوکمی کوفر و سەربڕینی ئەو پیاوە مەزنەیان داوە، چۆن و کەی و بە کام ئاماژەیە بێڕێزی بە پیرۆزیەکانی ئیسلامی کردووە؟

ئەو پیاوەی کە پیت بە پیتی وشەکانی خوداپەرستی لێدەبارێت و هەنێسک بە هەنێسکی هەناسەکانی خوداویستی دەشنێتەوە.

ئەو زانایەی کە دەیان و بگرە سەدان مەردی ڕەندی بۆ بەرگری کردن لەو پیرۆزیانەی ئێوە دەڵێن بێڕێزی پێ کردوون بار هێناوە و پێشکەشی ئۆمەتی ئیسلام و کۆمەڵگای کوردستانی کردوون، کە هەر یەکەی بوونە مانگێک و تیشکیان لە خۆری مەزنی دڵسۆزی و خۆشەویستی مامۆستایان بۆ ئیسلام و نیشتمان وەردەگرن.

 

ئەوەی دیارە و ڕوونە، حەوتووی وەحدەت و هاواری یەک بوونی سوننە و شیعە و دروشمی دەسەڵاتی ئیسلامی موحەممەدیتان درۆیەکە لە هەمبانە فشەی کابرا پڕ و پووچتر.

 

بەو پێیە کە بەپێی شەریعەتی ئیسلام:

 

۱_ڕا دەربڕین و وتووێژ ئازادە و کەس بۆی نیە خەڵک لەو بارەیەوە سنووردار بکات. وەک خودای گەورە لە حەزرەتی ئیبڕاهیمەوە _صلی الله علیه وسلم_ دەگێڕێتەوە پرسیاری لە بارەی هێزی خوداوە کردووە و گوتوویەتی کە خودا پێی نیشان بدات چلۆن مردوو زیندوو دەکاتەوە.

{وَإِذْ قَالَ إِبْرَاهِيمُ رَبِّ أَرِنِي كَيْفَ تُحْيِي الْمَوْتَىٰ} (البقره/٢٦٠)

 کەواتە ڕادەربڕین تەنانەت سەبارەت بە خوداش قەدەغە نیە و ڕێگە پێدراوە.

دەی کەوایە بۆ لە حکوومەتە بە ناو ئیسلامیەکەی ئێراندا چکۆلەترین ڕادەربڕین سەبارەت بە بۆنەیەکی (وەک ساڵیادی مردنی فاتمەی کچی پێغەمبەر _دروودی خودای لەسەر بێت، لە شارە سەتاسەت سوننی نشینەکاندا) کە هەمووی بێڕێزی و سووکایەتیە بە ئەهلی سوننەتی ئێران بە گشتی و کوردستان بە تایبەتی، قەدەغەیە و سووکایەتیە بە پیرۆزیەکانی ئیسلام؟

 

۲_ لە دەسەڵاتی ئیسلامیدا زانایانی ئایینی ئەوپەڕی ڕێز و حورمەتیان لێنراوە و بەو پەڕی شکۆوە ڕەفتاریان لەگەڵ کراوە، وەک خودای گەورەش دەفەرمێت بەس زانایانن کە بەڕاستی لە خودا دەترسێن:{ إِنَّمَا یخْشَی اللّه مِنْ عِبَادِهِ الْعُلَمَاءُ}(فاطر/٢٨)

ئەگەر وایە دەسەڵاتی ئیسلامی لەکوێ و بەند کردنی زانایانی ئایینی و ئەتکی ئەوان بە سزای داماڵینی لیباسی مەلایەتیان لەکوێ؟

 

۳_لە شەریعەتی ئیسلامدا بەرگ و لیباسی کۆمەڵایەتی و تاکەکەسی هەڵبژاردنێکی ئازادە و هیچ بەڵگەیەکمان لەسەر ئەوە نیە کە حکوومەت بۆی هەیە دەست تێوەردان لە بەرگ و پۆشاکی خەڵکی ژێر فەرمانیدا بکات.

 

ئەوەی دیار و ڕوونە ئەوەیە کە بەپێی ئەوەی گوترا و زۆر بەڵگەی سەلماوی دی، حکوومەتی کۆماری بە ناو ئیسلامی ئێران بە پێچەوانەی دروشمە کلۆر و بێ ناوەرۆکەکانی، نەک هەر ئیسلامی نیە، بەڵکوو لە کردەوەدا حکوومەتێکی تێئۆکڕات تووتالیتێری فیرعەونیە کە هیچ کە دەست تێوەردان لە بەرگ و لیباس و ڕووی دەرەکی ژیانی خەڵکیدا دەکات تەنانەت بەوەوە ناوێستێتەوە و دەیهەوێت فکری خەڵکیش داگیر بکات و دەستی تێوەردات و کردەوەکانی لە ژێر ئەم دوو بڕوا فیرعەونیانەدا ڕەنگ دەدەتاوە کە دەڵێت:

 

١_ تەنها ئەوەی من بڕوام پێی هەیە خەڵک بۆیان هەیە بڕوایان پێی بێت.

{قَالَ فِرْعَوْنُ مَا أُرِيكُمْ إِلَّا مَا أَرَىٰ}(غافر/٢٩)

فیرعەون گوتی: هیچ ڕێیەکتان نیشان نادەم جگ ئەو ڕێیەی کە خۆم پێم دروستە.

بۆیەش دەسەڵاتی کۆماری بە ناو ئیسلامی هەرچی بە پێچەوانەی بۆ چوونی خۆی بێت، بە تاوانی ناڕوونی موحارەبە و ئیفسادی سەر ئەرز و بێڕێزی بە پیرۆزیەکان بەر پەرچی دەداتەوە و سزای دەدات.

 

۲_وەک فیرعەون پێیان وایە ئەو خەڵکە بێ ئیزن و ئیجازەی وان بۆی نیە بڕوا و ئیمانی هەبێت.

{قَالَ آمَنْتُمْ لَهُ قَبْلَ أَنْ آذَنَ لَكُمْ}(طه/٧١)

فیرعەون گوتی: ئیمانتان بە مووسا هێناوە بەر لەوەی ڕێتان پێ بدەم.

پاشان سزاشیان بۆ دەردەکات و دەڵێت:{فَلَأُقَطِّعَنَّ أَيْدِيَكُمْ وَأَرْجُلَكُمْ مِنْ خِلَافٍ وَلَأُصَلِّبَنَّكُمْ فِي جُذُوعِ النَّخْلِ}(هەر ئەوەی پێشوو)

دەست و لاقتان بە پێچەوانەوە دەبڕمەوە و بە قەدی دارخورماوە هەڵتان دەواسم.

 

بۆیە وەک مامۆستایان و خوێندکاران و کەسایەتیە ئایینیەکانی ڕۆژهەڵاتی کوردستان سەر کۆنەی ئەو سزا نادادپەروەرانەیە سەبارەت مامۆستا لوقمانی ئەمینی دەکەین و بە لێک دانەوە و چەوتاندنی بە مەبست و تاک لایەنانەی دەقە شەرعی و یاساییەکان لە لایەن دەزگای دادی ڕێژیمەوە دەزانین و هۆشدار بە دەسەڵاتدارانی ئەو ڕێژیمە نیوە گیانە دەدەین، کە ئەگەر لەوە زیاتر لە هەندا خەڵکانی و چالاکوانانی کوردستان بە گشتی و کەسایەتیە ئایینیەکان بە تایبەتی، پێ لەبەڕەی خۆتان زیاد ڕاکێشن، تووشی گورزێک لە لایەن چالاکوانانی ئایینی و مەدەنی و جەماوەری خەڵکی کوردستانەوە دەبن، کە تاوێستا بەر چاوتان نەکەوتووە و بە فکریشتاندا نەهاتووە.

 

کۆمەڵێک لە مامۆستایان و خوێندکاران و کەسایەتیە ئایینیەکانی ڕۆژهەڵاتی کوردستان

٨/٦/٢٧٢٥ کوردی.

یەکیەتی زانایانی ئایینی کوردستانی ئێران

٨ی خەرمانانی ١٤٠٤ی هەتاوی