یادکردنەوەی مەولودی پێغەمبەر د.خ و پیرۆزبایی بەم بۆنەوە

بە ناوی خودایەک کە موحەممەدی نارد بۆ مرۆڤایەتی بۆ ئەوەی ببێتە رەحمەت بۆ هەموان _دروودی خودای لەسەر بێت_.

 

وا دیسان ڕەبیعولئەووەل هاتەوە و ساڵیادی لە دایک بوونی پێغەمبەری ئازیزە_دروودی خودای لەسەر بێت.

بەر لە گشت شتێک لە لایەن سەر جەم ئەندامان و دۆستانی ڕێکخراوەی یەکیەتی زانایانی ئایینی کوردستانی ئێرانەوە (یزاکا)، پیرۆزبایی جێژنی مەلوود لە سەرجەم خەڵکی موسوڵمانی جیهان بە گشتی و کوردستانی پیرۆز بە تایبەتی دەکەین.

 جێژنی مەولوود، هێمای وەفای گەلی کوردە بۆ پێغەمبەر دروودی خودای لەسەر بێت و ئەوپەڕی خۆشەویستی ئەو گەلە وەفادار و دڵ پڕ لە ئیمانەیە بۆ ئەو ڕێبەرە مەزنە.

هەر لەو دەمەوە یەکەم دڵۆپی فرمێسکی خۆشەویستی ئەو سەروەرە د. خ  بەسەر گۆنای سوڵتان موزەففەردا جۆگەلەی بەست و بڕیاری دا مەولوود وەک یادەوەریەک بۆ حەزرەتی محەممەد د . خ  پێک بهێنێت، تاوێستا شاعیر و نووسەر و بیرمەند و سەرلەبەری کۆمەڵانی کوردستانی ئازیز بوون بە عەشق و پێشکەشی ئەو نوورە نەمرە کران.

ئەم جێژنە کوردانەترین بۆنەی ئایینیە لە ئیسلامدا کە پەڕاوپەڕ لەگەڵ ئەم فەرماییشتەی پێغەمبەردا  دێتەوە کە فەرمووی:(یەکێک لە ئێوە ئیمانی تەواو نیە هەتا من لە دایک و باب و ڕۆڵە و خێزان و تەنانەت خۆشی لە لای خۆشەویستتر نەبم).

 بەڵام هەندێک بە ئانقەست و پیلان و هەندێکیش بە هەڵە و هەڵفریواوی بە دەم تەپڵی دوژمنانی ئایین و نەتەوەکەمانەوە هەڵدەپەڕن و جاڕی ناشەرعی بوونی مەولوود لێدەدەن!

 یەکیەتی زانایانی ئایینی کوردستانی ئێران (یزاکا) ئەو جۆرە فەتوایانە بە نازانستی و هاوردە و بە پێچەوانەی دەقە شەرعیەکانی و بۆ چوونی زانایانەی زانایانی ئیسلام دەزانێت و بەڕێوە بردن و بەشداربوون لە کۆڕ یادی لە دایکبوونی پێغەمبەردا  سڵاوی خودای لە سەر بێ بە ئیشێکی ڕەوا و جوان و شەرعی دەزانێت.

 بەڵگەکانیش لەسەر شەرعی بوونی ئەو بۆنەیە، بریتین لە:

 ۱_ بەپێی تەفسیری فەخری ڕازی (۱۰/١٥٦) خوای گەورە لە ئایەتی ٥٨ـی سووڕەتی یوونسدا کە دەفەرمێت :((قُلْ بِفَضْلِ اللَّهِ وَبِرَحْمَتِهِ فَبِذَلِكَ فَلْيَفْرَحُوا)) بڵێ بە هۆی مەزنێتی و سۆزی خوداوە با بە هۆی ئەودوانەوە خۆشحاڵ بن، مەبەست لە وشەی (وَبِرَحْمَتِهِ) پێغەمبەرمانە دروودی خودای لەسەر بێت.

پشتڕاست کەرەوەی ئەو لێک دانەوەیەش ئایەتی ۱۰۷ـی سووڕەتی ئەنبیایە کە دەفەرمێت: ((وَمَا أَرْسَلْنَاكَ إِلَّا رَحْمَةً لِلْعَالَمِينَ)) تۆمان نەناردووە جگە لە ڕەحمەت بی بۆ هەمووان.

۲_مەولوود دەبێتە هۆی ناسینی پێغەمبەر و ڕێگری دەکات لە نەناسینی ئەو خۆشەویستە  کە ڕێگەیەکە بۆ لاوازی ئیمان و بێ‌باوەڕی، کەوا قورئانی پیرۆز لە ئایەتی ٦۹ـی سۆڕەتی مۆئمنووندا دەفەرمێت:((أَمْ لَمْ يَعْرِفُوا رَسُولَهُمْ فَهُمْ لَهُ مُنْكِرُونَ))یان پێغەمبەرەکەی خۆیان نەناسیوە بۆیە نکۆڵی لێ دەکەن؟!

 ٣_ خوای گەورە ڕێز لە ڕۆژی لە دایک بوونی پێغەمبەر یەحیا و عیسا دروودی خودایان لەسەر بێتدەگرێت.وەک سەبارەت پێغەمبەر یەحیا _دروودی خودای لەسەر بێت_ دەفەرمێت:((وَسَلَامٌ عَلَيْهِ يَوْمَ وُلِدَ وَيَوْمَ يَمُوتُ وَيَوْمَ يُبْعَثُ حَيًّا)) (مریم/١٥) وە سڵاو لەسەر بەو بێت ئەو ڕۆژەی لە دایک بووە و ڕۆژێک کە دەمرێت و ڕۆژێک کە بە زیندوویی هەڵدەستێندرێتەوە.

یان لە زمانی پێغەمبەر عیساوە  دەفەرمێت:((وَالسَّلَامُ عَلَيَّ يَوْمَ وُلِدْتُ وَيَوْمَ أَمُوتُ وَيَوْمَ أُبْعَثُ حَيًّا)) (مریم/٣٣) وە سڵاو لەسەر من بێت ڕۆژێکی لە دایک بووم و ڕۆژێک کە دەمرم و ڕۆژێک بە زیندوویی هەڵدەستێندرێمەوە.

پرسیار ئەوەیە: ئایا پێغەمبەرمان د . خ  پلەی لەو دوو نێردراوەی خودا کە ناوبران بەرزتر نیە؟ یان لانیکەم هاوشانی وان نایەتەوە؟

بێگومان پێغەمبەرمان لەوان بەرزتر بووە، جا بۆیە کە ڕۆژی لە دایک بوونی ئەوان جێی ڕێز بێت، بە قیاسی ئەولا، ڕۆژی لە دایک بوونی پێغەمبەری ئیسلام دروودی خودای لەسەر بێت ڕێز لێگراوتر و خوازراوترە.

پشتڕاست کەرەوەی ئەو لێک دانەوەیەش ئەوەیە کە لە پێغەمبەرمان گێڕدراوەتەوە، کاتێک لێی دەپرسن بۆچی دووشەمووان بەڕۆژوو دەبێت؟ لە وەڵامدا فەرموویەتی: ئەوە ڕۆژێکە کە تێیدا لە دایک بووم و ڕۆژێکە تێیدا وەحییم بۆ هاتووە.(مسلم۲/٨۱۹ ژمارەی۱۱٦۲)کەواتە سەروەرمان خۆشی بە تایبەت نەک بەس ساڵانە بەڵکوو هەموو حەوتوویەک ڕێزی لە ڕۆژی لە دایک بوونی خۆی ناوە.

 ٤_شمس الدين أبو الخير الجزري، أبو الفرج ابن الجوزي، ابو شامة الدمشقي، ابن كثير، ابن دحية، ابن خلكان، سبط ابن الجوزي، ابن الأثير، العراقي، البلقيني، القاضي عياض، العسقلاني، السخاوي، السيوطي، السبكي، الهيتمي، ابن الحاج، الذهبي، ابن ناصر الدين الدمشقي، السبتي، ابن القيم، الحافظ وجيه الدين الزبيدي، شهاب الدين القسطلاني، الجاوي، الحضرمي، الدمياطي، علي القاري، ابن جبير، الصنهاجي، المقريزي، ابن قدور، ابن القاضي، ابن عذاري، التهامي، الطرابلسي، ابن عابدين، التلمساني، ابن العماد، السوسي، الشنقيطي، الميرغني، الحبيشي، البصروي، الباجوري، الخطيب الشربيني، ابو الحسن البكري، القاضي ابن الضياء المكي، ابن جزي، ابن بطوطة المغربي، السمهودي، العفيفي، البيانوي، الكتاني، الراضي، البراوي، النبتيني، النحراوي، الصاوي، المرزوقي، العطار، الرومي،  ابن الموقع، البرزنجي، ابن الخياط، الأزميري، أبو الوفاء، الخديم، المطيعي، محمد عليش المالكي، النبهاني، حسنين مخلوع، الشعراوي، عطية صقر، البالكي، عبد الكريم المدرس، البوطي، النابلسي.. و ده‌یانی تریش له‌ پێشه‌وایانی هه‌ر چوار مه‌زهه‌بی ئه‌هلی سوننه‌ت و جه‌ماعه‌ت باسیانكردووه‌و به‌ كارێكی شایسته‌و جوانیان زانیوه‌و دانراوی تایبه‌تیشیان له‌سه‌ر ده‌ركردووه.

کەواتە بە ئەهلی بیدعە ناوبردنی خەڵکانێک کە مەلوودی دەخوێنن، بە ئەهلی بیدعە دەرکردنی زیاد لە حەفتا موفەسیر و شارح حەدیس و فەقیهی ئۆمەتە.

 جا‌ وێڕای سەرکۆنە کردنی ئەو فەتوا نازانستیە هاوردانە، یەکیەتی زانایانی ئایینی کوردستانی ئێران (یزاکا)، بە ئامانجی سەلماندنی ئەمەکناسی خەڵکانی موسوڵمانی کوردستان بۆ پێغەمبەری ئازیز دروودی خودای لەسەر بێت و بە ئامانجی یەک دڵیمان لە مزگەوت و شوێن کەوتووییمان بۆ نەریتی مەزنی گەلەکەمان، داوا لە مامۆستایانی ئایینی و خوێندکارانی ئایینی و خەڵکی دینداری کورستان دەکات، تەکیە و مزگەوت و خانەقاکان بە بۆنخۆش کردن و شیرینی بەشینەوە و نوورانی کردن و کۆڕبەند گرتن، بە یادی مەلوودی پێغەمبەری لەبەر دڵان _دروودی خودای لەسەر بێت بڕازێننەوە. 

لێتان پیرۆز بێ یادی مەولودی پێغەمبەری ئازیزمان

یەکیەتی زانایانی ئایینی کوردستانی ئێران

٩ی خەرمانانی ١٤٠٤ی هەتاوی