پەیامی یزاکا لە ساڵوەگەڕی ژینۆسایدی کوردانی ئیزەدی
پەیامی یزاکا لە ساڵوەگەڕی کۆمەڵکوژی کوردانی ئیزەدی
هاونیشتیمانیان و باوەڕدارانی ئایینی ئیزەدی کوردستان و جیهان.
دەساڵ لەمەوبەر شاڵاوی تیڕۆریسمی دوژمنانی گەلمان لە بەرگی ئاییندا بۆ لێدان لە کورد و خاکی کورد و باوەڕ و پێکەوەژیانی دانیشتووانی کوردستان، بە سناریۆیەکی هەمیشەیی دوژمنانی دەوربەرمان، هێرشیان کردە سەر کوردستان و سەرەتا لە شەنگالی کوردستانی ڕەسەن، دەستیان کرد بە جینایەت وکوشتاری بە بەزەییانەی ئەم بەشە لە هاونیشتیمانیانمان.
ژینۆساید کوردانی ئیزەدی مۆرێکی ڕەشە بە ناوچاوانی ناحەزانی کورد لە هەر فکر وبیرۆکە و ئایدیایەکی ئایینی و غەیرە ئایینیدا بن، تا مێژووی کورد هەیە ئیزەدییەکان هەر کوردی ڕەسەن و هەر کوردستان خاکی پیرۆزیانە هیچ هێز و لایەن و باوەڕێک ناتوانێت کوردستان کەرت بکات و پێکەوەژیانی دانیشتوانی ئەم خاکە پیرۆزە تێک بدات.
یەکیەتی زانایانی ئایینی کوردستانی ئێران، لە ساڵوەگەڕی ئەم جینایەتە لەبیر نەکراوە، هاوخەمی خۆی پێشکەش بە ئیزەدییەکان و شێخ و پیاوە گەورەکانی ئیزەدی لە هەرێم وسەرجەم جیهان دەکات و ئیدانەی ئەو کۆمەڵکوژییە دەکات، هیوادارین ئازیزانمان بە ماف و ئازادییەکانیان بگەن و لە ئاژاوە و دووبەرەکی بەدوور بن، ڕوحی سەرجەم ئەو ئازیزانەمان شاد و سەبووری بۆ گشت بنەماڵەکانیان.
یەکیەتی زانایانی ئایینیی کوردستانی ئێران
١٣/٥/١٤٠٣ی هەتاوی
Comments
Post a Comment