پەیامی پیرۆزبایی یزاکا بە بۆنەی ٢ی ڕێبەندان دامەزرانی کۆماری کوردستان

لە ساڵوەگەڕی ٢ی ڕێبەندانی هەر ساڵێکدا یادی ئەو ڕۆژە پڕشکۆیە بە ڕێز و سەری کڕنۆشەوە دەکەینەوە کە قازی پێشەوا لە چووارچرای شاری مهاباد، بە بەشداری گەورەپیاوان و زانایان و کەسایەتی سیاسییەکانی کورد، بە تایبەت حیزبی دێموکراتی کوردستان، کۆماری کوردستانی ڕاگەیاند و ڕەسمەن کورد بوو بە خاوەنی دەسەڵاتی خۆیی و تا مێژوومان هەبێت بە بەڕزی و شانازیەوە یاد دەکرێتەوە:

کۆماری کوردستان لە کاتێکدا دامەزرا کە شەڕی دووهەمی جیهانی لە نێوان ئاڵمان و بەرەی هاوپەیمانان دەرفەتێکی بۆ گەلی کورد ڕێکخست کە بتووانێت کەڵکی پێویستی لێوەرگرێت و ببێتە خاوەنی کیان و سەربەخۆیی سیاسی و کلتووری خۆی، بەڵام بە هۆی ململانێ ی نێوان ڕووسەکان لە گەڵ ڕژیمی ئەوکاتی پەهلەوی و هاتن و داگیرکاری بەشێکی بەرچاوی خاکی ئێران لە لایەن هاوپەیمانەکانی ئامریکا و بریتانیا و سات و سەودای نێوان دەوڵەتی پەهلەوی لە گەڵ ڕووسەکان بە شێوەی نهێنی و بەڵێن و پەیمانەکانی ئەوڕژیمە فاشیستە بە ڕۆژئاواییەکان وایکرد کە کورد و ئازەریەکان ببنە قوربانی ئەو سات و سەودا نامڕۆڤانەیەی نێوانیان، هەرچەند کۆماری کوردستان تەمەنێکی کورتی هەبوو بەڵام دەسکەوتی زۆر و پڕ نرخ و بەهای لە دووای خۆی جێ هێشت، کە دەکرێت ئاماژە بە ئاڵاو و سروود و ناوی پیرۆزی پێشمەرکە و یەکێەتییەکانی لاوان و ژنان بکەین، هاوکات کۆماری کوردستان بووە هۆی یەکیەتی و یەکگرتنی زیاتری ناو ماڵی کورد و تەکیەگای کوردانی نیشتیمانپەروەر.

١١ مانگ تەمەنی کۆمار و قارەمانەتی پێشەواو و دامەزرێنەرانی کۆماری کوردستان تا هەتایە لە ناو مێشک و بیری کوردی ڕەسەن و خاوەن ویژدانی نیشتیمانپەروەری، لە یاد ناکرێت، کورد هەمیشە بۆ گەییشتن بە ئاوات و ئامانجەکانی کۆماری کوردستان بوێرانە ڕێگای خەبات و بەربەرەکانی لە گەڵ داگیرکەران و خۆسەپێنەرانی گرتۆتەبەر و سڵی لە دوژمن نەکردۆتەوە.

ڕێبوارانی ڕێگای کۆماری کوردستان هەرساڵ یادی ئەم ڕۆژە پڕ شانازیە دەکەنەوە و بەڵێن و پەیمان نوێ دەکەنەوە تاسەر وەفاداری کۆماری کوردستان بن.

یەکیەتی زانایانی ئایینی کوردستانی ئێران وێڕای پیرۆزبایی لە حیزبی دامەزرێنەری کوماری کوردستان لە ٢ی ڕێبەندان و سەرجەم خەڵکی نیشتیمانپەروەری کوردستان و شۆڕشگێرانی ئەم ڕێبازە مەزنە و بنەماڵەی شەهیدان و زیندانیانی سیاسی، بەڵێن نوێ دەکەینەوە بۆ گەییشتن بە ئامانجەکانی کومار هەردەم پاڵپشت و پشتیوانی ئێوە حیزب و شۆڕشگێرانی دێموکرات بێت.

پیرۆزە یادی ئەم ڕۆژە پڕ شکۆیە...

یەکیەتی زانایانی ئایینی کوردستانی ئێران

١ی  ڕێبەندانی ساڵی ١٤٠٢ ی هەتاوی