ڕەمەزان مانگی پڕ بەرەکەتی خودای دلۆڤان، پیرۆز بێت

 شهر رمضان الذی انزل فیه القران هدی للناس و بینات من الهدی والفرقان

مانگی ڕەمەزان ئەو مانگەیە کە قورئانی تێدا هاتۆتە خوارەوە، ئەم قورئانە ڕێنوێنی بەخشە بۆ خەڵک و بەڵگەی زۆری تێدا..

ڕەمەزان مانگی بەخشش و لێبووردەیی و دووربوون لە ڕەوشتی نادرووست و گەڕانەوە بۆ ڕێگای ڕاستە" ڕەمەزان وەک میوانێکی گرانقەدر سەردانمان دەکات تاکو پەیامی خوداوەندی دلۆڤانمان لە مەڕ لێخۆشبوون و ئازادی و ڕزگاری لە ئاگری دۆزەخمان پێ بدات، هەر باوەڕدارێک بە باوەشی گەرمەوە پێشوازی لەم میوانەپڕ بەرەکەتە بکات و فەلسەفەی ڕۆژوو کە بەخشینە بە هەژاران و لێقەوماوان و بە کار هێنانی زمانی شیرین لە گەڵ دراوسێ و ناسیاوان، دەکەوێتە بەر بەخشش و ئازادی ڕۆژی دووایی(اذا جاء رمضان فتحت ابواب الجنة، و غلقت ابواب النار، و صدفت الشیاطین) کاتێک ڕەمەزان هات دەرگاکانی بەهەشت دەکرێنەوە، دەرگاکانی دۆزەخ دادەخرێن، شەیاتینەکان کۆت و زەنجیر دەکرێن..

مسوڵمانان تەنیا خۆ برسیکردن و تینوو کردن واتای ڕەمەزان نییە بەڵکو گەڕانەوە بۆ سەر ڕەوشتی ئیسلامی و لێبووردن و فیداکاری و سەردانی بنەماڵەی زیندانیانی سیاسی و شەهیدان و هەژاران و هاوکاری کردنیان ئەرکێکی ئایینییە و فەڵسەفەی بوونی ڕەمەزانێکی درووستە...

دڵ خۆشکردنی مناڵی نەدار و لێقەوماو لە ڕۆژانی ڕەمەزان بە تایبەت کاتی ئیفتار بەدەستهێنانی قەسرێکی بەهەشتییە، ئاشتەوایی و ئاشت بوونەوە و سیلەی ڕەحم لە گەڵ خزمان و دراوسێکان ئازادی لە ئاگری دۆزەخ و وەرگرتنی سەنەدی بەهەشتە..

 پیرۆزباییتان لێ دەکەین و لە خوداوەندی مەزن ئەپاڕێینەوە ئەم ڕەمەزانە مانگی ئاشتی و ڕزگاری لە ناخۆشییەکانی هەر دووک جیهان بێت و نوێژ و ڕۆژوو و هەموو عیبادەتەکانتان قەبوڵی بارگایی حەق بێت. 

یەکیەتی زانایانی ئایینی کوردستانی ئێران

٢ی خاکەلێوەی ساڵی ١٤٠٢ی هەتاوی