کۆچی دووایی حاجی مامۆستا مەلا موحەممەد ڕزایی

 کۆچی دووایی کەسایەتییەکی ئاییینی و خۆشناوی دەڤەری سەلاسی باوەجانی جەنابی حاجی مامۆستا موحەممەد ڕزایی ناسراو بە مەلا موحەممەد باوەجانی خەسارێکی مەزن بوو لە بزاڤی ڕزگاریخوازی کورد و ئەم دەڤەرە..

خودالێخۆشبوو ساڵی ١٣٢١ی هەتاوی لە گووندی مەیدان سەر بە سەلاسی باوەجانی لە بنەماڵەیەکی ئایین دۆست و کورد پەروەر لە داییک بوو، هەر بۆیە بنەماڵەکەیان مامۆستایان ناردە حوجرەی ئایینی تاکو بتووانێت خزمەت بە ئایین و نەتەوەکەی بکات.

پاش تەواوکردنی وانە ئایینییەکان و کەسبی ئیجازەنامەی مەلایەتی لە ناوچەکە خەریکی وتنەوەی وتاری ئایینی و پێش نوێژ و هەروەها کاری وەرزێری بوو، کەسایەتییەکی دیار و باوڕمەندێکی دڵسۆز بە مافی گەل و نیتیمانەکەی بوو، پاش شۆڕشی گەلانی ئێران بە دژی ڕژیمی پەهلەوی پەیوەندی بە حیزبی دێموکراتی کوردستانی ئێرانەوە دەگرێت و شانازی وەرگرتنی ئەندامەتی ئەو حیزبە وەردەگرێت.

زەخت و گووشار و دوژمنکاریەکانی کۆماری ئیسلامی ئێران ناچاری دەکات هاوشێوەی ‌هاوڕێیانی ئەم ڕێبازە پیرۆزە ڕۆژهەڵات بەرەو باشووری کوردستان جێ بێڵێت، لە شاری ڕوومادییەی عێراق بوێرانە پشتیوانی لە مافی پەنابەرانی کوردی ڕۆژهەڵات دەکات و بە نوێنەرایەتی ئاوارەکانی کەمپی ڕۆمادی سەردانی کۆشکی دەسەڵاتی عێراق دەکات.

خودالێخۆشبوو خۆشەویستی هەموو ئەو ئاوارانەی ڕۆژهەڵات بوو کە لە کەمپی ئاوارەکانی ڕۆمادی و سەرجەم ئەندامانی حیزبی دێموکرات و خەڵکی نیشتیمانپەروەری کوردستان بوو، ساڵی ١٣٧٥ جارێکیتر بۆ ڕۆژهەڵاتی کوردستان دەگەڕێتەوە، بەڵام هەروەا وەفادار بە ڕێبازی پێشەواقازی و ڕێبوارانی ڕێگای ئازادی دەمێنێتەوە تاکوو ڕۆژی یەکشەمبە ڕێکەوتی ٢٣ی ڕێبەندانی ١٤٠١ی هەتاوی لە تەمەنی ٨٠ ساڵیدا ماڵ ئاوایی لە ژیان دەکات.

یەکیەتی زانایانی ئایینی کوردستان سەرەخۆشی لە ماڵباتی خودالێخۆشبوو و دانیشتوانی دەڤەری سەلاس دەکات، لە خودای گەورە ئەپاڕێینەوە بە فردەوسی بەرین شادی بکات.

انا للە وانا الیە راجعون.

یەکیەتی زانایانی ئایینی کوردستانی ئێران

٢٤ی ڕێبەندانی ١٤٠١ی هەتاوی