پەیامی پیرۆزبایی بە بۆنەی ٢ی ڕێبەندان

 پەیامی پیرۆزبایی یەکیەتی زانایانی ئایینی کوردستانی ئێران بە بۆنەی ساڵوەگەڕی ٢ی ڕێبەندان ساڵوەگەڕی دامەزرانی کۆماری کوردستان.

بەڕێزان ڕێبەرایەتی و ئەندامانی حیزبی دێموکراتی کوردستانی ئێران.

هاونیشتیمانیان و حیزب و لایەنە سیاسییەکانی کوردستان.

یەکیەتی زانایانی ئایینی کوردستانی ئێران یادی دامەزرانی کۆماری پڕ شکۆی کوردستان لە ئێوە ئازیزان پیرۆزبایی دەکات.

کۆماری کوردستان لە سەردەمێک دامەزرا کە کێشەی نێوان زلهێزانی وەک ڕۆژئاواییەکان و ڕووسیە کە خاکی کوردستانیان لە نێوان خۆیان دابەش و داگیر کردبوو واتە ڕۆژئاواییەکان لە ڕۆژهەڵات و باشووری کوردستان و ڕووس لە باکوور و ڕۆژئاوا، خەریکی ململانێ کردنی یەکتر بوون لە مەڕ دابین کردنی بەرژەوەندییەکانیان، لە لایەکیترەوە ڕژیمی پەهلەوی تووشی زەعف و پاشەکشە بوو، بۆیە دڵسۆزانی کورد بە سەرۆکایەتی پێشەوای نەمر لە ٢ی ڕێبەندانی ساڵی ١٣٢٤ی هەتاوی بە کەڵک وەرگرتن لەم دەرفەتە تووانی لە مهاباد و شارەکانی دەوروبەر کە دوور بوو لە دەست تێوەردانی زلهێزان، بە پاڵپشتی خەڵکی نیشتیمانپەروەر و تێکۆشەرانی بەشەکانیتری کوردستان کۆماری کوردستان دامەزرێنێت.

کۆماری کوردستان وەرچەرخانێکی مێژوویی بوو لە شۆڕش و بەرخوودانی گەلی کورد و خاڵی دەستپێکی شۆڕشێکی نوێ و سەردەمیانە بوو لە جۆڵانەوەی گەلی کورد و، بوو بە پێشەنگی دامەزرانی چەندین پارتی سیاسی موودێڕن لە هەر چووار پارچەی کوردستان.

کورد بۆ یەکەمجار خاوەنی دەسەڵاتی سەربەخۆی خۆی تاقی کردەوە و بەحەق نیشانی جیهانیدا کە کورد توانای بەڕێوەبردنی دەسەڵاتێکی موودێڕن و دێموکرات و سەردەمیانەیە، کۆماری کوردستان لەم سەردەمەدا لە خۆرهەڵاتی ناوین و ناوچەکە نموونەیەکی تازە و سەردەمیانە بوو کە کەم وێنە یان هەر نەبوو.

کۆماری کوردستان چەندین دەسکەوتی مێژوویی بۆ کورد تۆمار کرد وەک درووست کردنی هێزی پێشمەرگە و ئاڵا و سروودی نەتەوەیی و دامەزرانی چەندین ڕێکخراوی وەک ژنان، لاوان و چەندین گۆڤار و ڕۆژنامە و پەرتۆک، هەروەها کۆمار بوو بەهۆی کۆ کردنەوەی هەموو هێزە شۆڕشگێرەکانی کوردستانی گەورە و گشتیان لە ژێر ئاڵای کوردستان بوون بە خاوەن دەوڵەتێکی هەرچەند بچووک بەڵام قەبوڵکراو.

ئەگەرچی تەمەنی کۆمار کەم بوو و لە ١١ مانگ زیاتر نەبوو بەڵام تووانی کورد بە کشتی یەک دەنگ و یەک ئامانج بکات.

جارێکیتر بەم بۆنە پیرۆزەوە، پیرۆزبایی خۆمان ئاراستەی حیزبی دامەزرێنەری کۆماری کوردستان، حیزبی دێموکراتی کوردستانی ئێران و سەرجەم شۆڕشگێرانی کورد و خەڵکی بەشەڕەف و نیشتیمانپەروەر و بنەماڵەی شەهیدانی سەربەرز و زیندانیانی خۆڕاگری سیاسی دەکەین، ئاواتەخوازین بە یەکگرتوویی و یەکبوون ئامانجەکانی گەلەکەمان بەدی بێت.

سڵاوی لە پێشەوای کوردان و سڵاو لە گشت خەباتگێڕانی کورد. 

بڕووخێت دەسەڵاتی داگیرکەری کوردستان.

یەکیەتی زانایانی ئایینی کوردستانی ئێران

١ی ڕێبەندانی ساڵی ١٤٠٠ی هەتاوی