ڕاگەیاندراوی یزاکا لە مەڕ دەستبەسەرکردنی لاوانی کورد

 خەڵکی بە شەڕەفی کوردستان، باوەڕدارانی ئایینی پیرۆزی ئیسلام، ڕێکخراوە مرۆڤدۆستەکان، حیزب و لایەنە سیاسییەکان...

کۆماری پەت و سێدارەی ئێران بە دڕێژایی تەمەنی پڕ لە دوژمنکارانەی خۆی بە دژی دانیشتووانی ئێران بە گشتی و نەتەوە بن دەستەکان و باوەڕدارانی ئایین و مەزهەبە جیاوازەکان بە تایبەتی، هیچکات لە کوشتن و زیندانی کردن و تەجاوز و بێ ڕێزی و ماڵوێران کردنی خەڵکەکەمان خۆی نەبوواردووە و بە دڕندانەتەرین شێوە هێرشی بۆ سەر کورد و بەلوج و عەڕەب و باوەڕدارانی غەیرە شیعی ئەنجامداوە...

هێرشی ڕژیم لە ساڵەکانی ٥٨ تاکو ٦٢ بۆ سەر شارەکانی کوردستان و قەتڵ و عامی لاوان و بە ساڵاچووانی کورد و کوشتنی دەیان و سەدان مامۆستای ئایینی سوونەمەزهەب لە یاد و بیرەوەری گەلەکەمان هەروا ماوە و جیهان و سەرجەم مرۆڤایەتی شاهیدی ئەو وەحشیگەری ڕژیمی بە ناو ئیسلامی ئێرانن.

هەروەک ئاگادارن ماوەیەکە لە درێژەی ئەو جینایەتانەی بە دژی گەلی کورد و بەلوچ و عەرەب بێ بەزەیانە و بێ باکانە لە بێ دەنگی وڵاتانی جیهانی خەریکی لە سێدارەدانی چالاکانی مەزهەبی و سیاسی و هەروەها بە شێوەیەکی هەڕەمەکی لاوان و ئازادیخووان و چالاکانی مەدەنی دەستبەسەر دەکات و بۆ شوێنانێکی نادیار دەیانبات، هەر لە ماوەی یەک مانگی ڕابردوودا زیاتر لە ٩٠ لاوی کوردی لە شارەکانی کوردستان بە تۆمەتی جۆراوجۆر دەستبەسەر کردووە و چەندین زیندانی سیاسی و عەقیدەتی بەلوچ و کوردی لە سێدارەداوە.

ئاشکرایە ڕژیمی مرۆڤکوژ و دژە ئایینی بە ناو ئیسلامی ئێران، دەسەڵاتە نگریسەکەی لە سەر لێواری هەڵدێر دا دەبینێت و ترسێکی مەزنی لە ڕاپەڕینی جەماوەر هەیە و دەیهەوێت بە چاوترساندنی خەڵکی کورد و بەلوچ و عەرەب خۆی وەک دەسەڵاتێکی بەهێز نیشان بدات و شەقامی شارەگەورەکانی وەک تاران و ئیسفەهان هتد کپ و بێ دەنگ بکات.

بەڵام ئەوەی ڕوونە ئەوەیە ڕژیمی ئێران لە کۆتاییەکانی دەسەڵاتی دیکتاتۆر و توتالیتێری ئاخوندیدایە و ناتووانێت بەم جۆرە سناریۆ و ڕەشبگیریانە خەڵکی وەزاڵەهاتووی ئێران بێ دەنگ بکات.

پێویستە گەلەکەمان هۆشیارتر و بوێرانەتر بە گژ ئەم دوژمنکاریانەدا بچنەوە و ڕێگا نەدەن زۆر سانایی لاوانمان دەستبەسەر و ڕەوانەی سیاچاڵەکانی بکات، یەکێتی زانایانی ئایینی کوردستانی ئێران وێڕای ئیدانەکردنی ئەم ڕەوتە نامڕۆڤانەی ڕژیم پاڵپشتی خۆی بۆ حیزب و لایەنە دژبەرەکانی کۆماری ئیسلامی دووپاتە ئەکاتەوە و داواکارین خەڵک و حیزبەکان یەکگرتوو بن و پێکەوە بۆ وەدیهاتنی ئامانجی کەلەکەمان هەنگاو بنن، هەروەها داوا لە سەرجەم وڵاتانی دێموکراتیک و ڕێکراوە مرۆڤدۆستەکان دەکەین ڕێگا نەدەن کۆماری دیکتاتۆری تیرۆریستی ئاخوندی زیاتر لەوە خوێنی لاوانمان بکاتە لەمپەری شکستەکانی خۆی.

بە هیوای وەدیهاتنی ئازادی بۆ ئێران و کوردستان

بڕوخێت ڕژیمی مرۆڤکوژی ئاخوندی

یەکێتی زانایانی ئایینی کوردستانی ئێران

١١/١١ی ١٣٩٩ی هەتاوی