ئیدانەکردنی تۆپبارانی دەڤەری سیدەکان

سپای تیڕۆریستی پاسدارانی ئێران بۆ شاردنەوەی شکستەکانی لە بەرانبەر ئیرادەی گەلی کورد و حیزبی دێموکرات، زۆر ناجووامێرانە و بەشێوەیەکی دڕندانە و دوور لە پڕەنسیپی ئەخلاقی نێونەتەوەیی دەستی بە تۆپبارانی گووند و ڕەز و باغ و  کوێستانەکانی کوردستانی باشوور کردووە

ئەمڕۆ، کاتژمێر ١٢:١٠ خولەکی نیوەڕۆ، تۆبخانەی ڕێژیمی ئێران لە لای "دۆڵ مەیدانـ"ـەوە، بۆمبارانی دەڤەری سیدەکان، لە گوندەکانی: "بەربەزین، دێرێ، داسنیا، تەلان، بێ قەپوشک و دوستانا"ی کرد و لە ئەنجامدا و لە گوندی "دێڕێـ"دا، کچێکی ١٨ ساڵە بە ناوی "زەیتوون قادر" شەھید بووە و دوو برایشی بە ناوەکانی "سیروان قادر"، تەمەن ٢٣ ساڵ و "ئیسماعیل قادر"، ١٤ ساڵە، بەسەختی بریندار بوونە.

لەم تۆپباران و کاتیووشابارانەدا، خەسارێکی زۆر بەر ژینگەی ناوچەکە گەیشتووە و ئاگری دارستان، ڕەز و پاوانی ئەو شاخانە، هەتا ئێستاش بەردەوامە.

یەکێتی زانایانی ئایینی کوردستانی ئێران وێڕای ئیدانەکردنی ئەم کردەوە تیڕۆریستیانەی ڕژیمی دژە مرۆیی ئێران پرسە و سەرەخۆشی خۆی ئاراستەی بنەماڵەی شەهیدەکە و خەڵکی دەڤەری سیدەکان دەکات و داواش لە کۆمەڵگایی نێونەتەوەیی دەکات پێش بە کاولکاری زیاتری ڕژیمی تیڕۆریستی ئێران بگرن و ئیزن نەدەن لەوە زیاتر سەروەری خاکی وڵاتێکیتر پێشێل بکات.

هیوادارین سەرجەم خەڵکی دەڤەرەکە و پارتەسیاسییەکانی کورد لەم ئاگربارانەی تیڕۆریستانی ئێران سڵامەت بن.

یەکێتی زانایانی ئایینی کوردستانی ئێران

۱۹/٤/۱۳۹۸