پیرۆزبایی بە بۆنەی نەورۆز و ساڵی تازە

 یا محول الحول و الاحوال یا مدبر الیل و النهار حول حالنا الی احسن الحال

• سەرەتا بە بۆنەی ساڵی تازە و نەورۆزی کوردەواری پیرۆزبایی خۆمان پێشکەش بە سەرجەم گەلی کورد و دانیشتووانی وڵاتی ئێران و بنەماڵەی شەهیدانی سەربەرز بە تایبەت شەهیدانی شۆڕشی ژینا و هەموو شۆڕشگێران و زیندانیانی خۆڕاگری سیاسی گەلەکەمان دەکەین و هیوادارین بە ماف و ئازادییەکانیان بگەن

هاونیشتیمانیانی نیشتیمانپەروە و ئازا و بوێر" ئەگەرچی نەورۆز گۆڕانکاری سرووشتییە و وەرزی سەرما و سۆڵە کۆتایی دێت و وەرزێکی نوێ و بەرگێکی تازە دەخاتە ڕووخساری زەوی و شادی و خۆشی هێنەرە، بەڵام بۆ ئێمەی کورد چووارچێوەیەکی فیکریە بۆ گەییشتن بە ئازادی و، هەروەها وانەیەکی ڕاپەڕینە بە دژی داگیرکاری و خۆسەپاندن و زەوتکەرانی مافی نەتەوەیی. نەورۆز هیمای یەکبوون و دەست لە دەستگرێدانی ڕۆڵەکانی نیشتیمانە بۆ بەدیهاتنی ئامانج و خوواستەکانمان هەر بۆیەش دوژمنە جۆراوجۆرەکانمان بۆ هەڵوەشاندنەوەی ئەم پاڕادایم و یەکیەتییەمان بە ناوی دین و بە ناوی تاوانی ئایینی دەیانهەوێت نەورۆزمان لێ زەوت بکەن و هەڵی بوەشێننەوە تاکو بەم جۆرەش زەربەیەکی قورس لە هەیکەلی یەکێتی و ڕاپەڕینمان بدەن

هاونیشتیمانیان" نەورۆز نە بۆنەی ئایینیە و نە ئاگر و چووار دەوری ئاگریش تاوان و خیلافی شەرعە، بەڵکو ئاگر خۆی یەکێک لەو نیعمەت و بەخشیشانەی خوداوەندە بۆ مرۆڤایەتی، بۆیە هەر بۆنەیەک ئەگەر تێکەڵاوی بابەتی ناشەرعی نەبێت هیچ بەڵگەیەکی حەرام بوونی لە سەر نییە، ئێمە لە نەورۆزدا هەم بەڵێن و پەیمان لە گەڵ خوداوەندی سرووشت و هەم لە گەڵ گەلەکەمان نوێ دەکەینەوە کە وەفاداری ڕێبازی مرۆڤایەتی و ئەو مافانە بین کە پەروەردگار بە ئێمەی بەخشیوە

بۆیە جارێکیتر وێڕای پیرۆزبایی ساڵی تازە و نەورۆزی کوردان، لە خوداوەندی گەورە

ئەپاڕێینەوە ڕوحی شەهیدانمان بە بەهەشتی بەرین شاد بکات و ئاوات و ئامانجی گەلمان بەدی بێت

هەر ڕۆژتان نەورۆز و نەورۆزتان پیرۆز بێت

یەکیەتی زانایانی ئایینی کوردستانی ئێران

• 
  
  ٢٩ی ڕەشەمەی ساڵی ١٤٠١ی هەتاوی